როგორ გავამარტივოთ სარემონტო პროცესი?

სახლის რემონტი ბევრისთვის სასიამოვნო პროცესია. ამ დროს საკუთარ თავს საშუალებას აძლევ, რომ შენი საცხოვრებელი სივრცე გაახალისო და შენი ოცნების ადგილად გარდაქმნა. ამის მიუხედავად, ვისაც ერთხელ მაინც ჰქონია რემონტი სახლში, იცის, რომ პროცესი სირთულეებით და მოულოდნელობებით არის სავსე: უეცრად შეიძლება აღმოაჩინო, რომ სარემონტო მასალები არ გყოფნის ან ბიუჯეტში ვერ ჯდები. პროცესი განსაკუთრებით მათთვისაა რთული, ვინც ასეთი მნიშვნელოვანი მოვლენისთვის შესაფერისად მომზადებული არ არის. 

დღევანდელი ბლოგის მიზანია, მოგამარაგოთ ყველა საჭირო რჩევით, რომელიც რემონტის პროცესს გაგიადვილებთ. 

1. დაგეგმე ზუსტად

პირველი, რაც რემონტის დაწყებამდე უნდა გააკეთო, დაგეგმვაა. ცხადია, რემონტის ჩატარების გადაწყვეტილებაც დაგეგმვის ნაწილია, თუმცა პირველ ეტაპზე ბევრად მეტია საფიქრალი, ვიდრე უბრალოდ თქმა, რომ რემონტის დაწყებას აპირებ. მნიშვნელოვანია, რომ თავიდანვე გქონდეს ზუსტი წარმოდგენა იმის შესახებ, რისი მიღწევაც სარემონტო სამუშაოების შემდეგ გინდა. არ დაინანო დრო და ენერგია განლაგების, ფერებისა და მასალების შერჩევაში. ამ გზით, მთელი პროცესის განმავლობაში უწყვეტად გაუყვები სამოქმედო გეგმას და უსიამოვნო სიურპრიზებისგანაც დაიზღვევ თავს. 

დაგეგმვის ეტაპზე მნიშვნელოვანია ოჯახის წევრების საჭიროებებიც გაითვალისწინო, გარდა იმ შემთხვევისა, თუ მარტო ცხოვრობ და სახლი მხოლოდ შენზე უნდა იყოს მორგებული. თუ სახლში ბავშვები გყავს, სათამაშო სივრცის შექმნაზეც უნდა დაფიქრდე და ჩვეულებრივზე მეტად იზრუნო უსაფრთხო გარემოს შექმნაზე; თუ სახლიდან მუშაობ, მნიშვნელოვანია საკუთარი თავისთვის კაბინეტი ან უბრალოდ საერთო სივრცისგან გამოყოფილი სამუშაო ადგილი მოიწყო. 

2. განსაზღვრე ბიუჯეტი

ბიუჯეტის განსაზღვრა რემონტისთვის მოსამზადებლად უმნიშვნელოვანესი ნაბიჯია. თუ გინდა, რომ პროცესი სტაბილურად მიმდინარეობდეს, აუცილებელია, წინასწარ გადაწყვიტო, რამდენის დახარჯვას აპირებ. თუ შენს სიტყვას არ გადახვალ, ზედმეტის დახარჯვა არ მოგიწევს და შენი შესაძლებლობების ფარგლებში იმოქმედებ. ბიუჯეტის შედგენისას არ დაგავიწყდეს მოულოდნელი ხარჯებიც, მაგალითად, დაზიანების შემთხვევაში შეკეთების ან პროდუქტის ახლით ჩანაცვლებისთვის. 

ბიუჯეტის განსაზღვრისას მაქსიმალურად რეალისტი უნდა იყო. შეიძლება, ცდუნებამ გძლიოს და სასურველი შედეგის მისაღწევად იმაზე მეტის დახარჯვა მოინდომო, ვიდრე შეგიძლია. თუ საკუთარ თავზე გაიმარჯვებ და შენი ფინანსური შესაძლებლობებიდან გამომდინარე სწორად შეადგენ ბიუჯეტს, დამატებით სტრესს და ვალებსაც აიცილებ თავიდან. თავიდანვე შეაფასე, შენი დანაზოგით გაწვდები ხარჯებს რემონტისთვის თუ სესხის აღება დაგჭირდება. უკანასკნელ შემთხვევაში შეადგინე გეგმა, როგორ შეძლებ თანხის უკან გადახდას. 

3. ყურადღებით შეარჩიე მუშახელი

დაგეგმვისა და ბიუჯეტის განსაზღვრის შემდეგ მუშახელის შერჩევის დრო დგება. მნიშვნელოვანია სანდო და გამოცდილი ხელოსნები აარჩიო, რომლებიც თავიანთ ვალდებულებებს პასუხისმგებლობით მოეკიდებიან. დიდი დრო დაუთმე ხელოსნების მოძიებას. თუ ინტერნეტით გადაწყვეტ ძებნას, წინა კლიენტების შეფასებებს გაეცანი, თუ ტრადიციული მეთოდებით გინდა მუშახელის დაქირავება, მაშინ ახლობლებში გაიკითხე. რაც მთავარია, არ მოგერიდოს პოტენციური ხელოსნებისგან მათი წინა სამუშაოების შესახებ სიტყვიერი თუ ვიზუალური ინფორმაციის მოთხოვნა. 

ხელოსნის კომპეტენციასთან დაკავშირებით ათასგვარი კითხვა შეიძლება გაგიჩნდეს.  ჰკითხე წინა გამოცდილების შესახებ, გაარკვიე, მუშაობის როგორი სტილი აქვს და რა დრო სჭირდება სტანდარტული დავალებების შესასრულებლად. მნიშვნელოვანია, რომ ამ კითხვებზე ამომწურავი პასუხები მიიღო და დარწმუნდე, რომ შენი სახლის ბედს პროფესიონალს აბარებ. 

4. დაამყარე ეფექტური კომუნიკაცია

ეფექტური კომუნიკაცია წარმატებული რემონტის გასაღებია. ერთია, გქონდეს სასურველი ჩანაფიქრი, ხოლო მეორეა ჩანაფიქრის მუშახელამდე მიტანა. სწორედ ამ ეტაპზე თამაშობს ეფექტური კომუნიკაცია გადამწყვეტ როლს. მკაფიოდ და დალაგებულად აუხსენი ხელოსანს შენი ხედვა და მოლოდინები. ამ გზით დარწმუნდები, რომ მას შენი საჭიროებები გაცნობიერებული აქვს და შენთვის სასურველ შედეგამდე მისვლა არ გაურთულდება. 

ეფექტურ კომუნიკაციაში უპირველესად კონკრეტული და დეტალური ახსნა იგულისხმება. თუ ვერბალური კომუნიკაცია არ კმარა, მიმართე ვიზუალურ მასალას, მოამარაგე ხელოსანი ფოტოებით, ჩანახატებით და ვიდეოებით. თავადაც მოუსმინე პროფესიონალის აზრს და გაითვალისწინე მისი რჩევები. 

5. არ დაგენანოს ხარისხიანი მასალა 

მაღალი ხარისხის სარემონტო მასალის გარეშე შეუძლებელია სასურველ შედეგამდე მისვლა. როცა მიხვდები, რომ უკვე საკმაოდ დიდი თანხა დახარჯე, შეიძლება ფულის დაზოგვა ხარისხის შემცირების ხარჯზე მოინდომო. ასე სამომავლოდ ბევრ პრობლემას გადააწყდები. უხარისხო მასალა მალე გაიცვითება და მათი გამოცვლაც დროზე ადრე დაგჭირდება, რაც თავისთავად დამატებით ხარჯებთანაა დაკავშირებული. 

დაიმახსოვრე, რომ თუ ხარისხიანი მასალა არ დაგენანება შენი სახლისთვის, წლების განმავლობაში შეძლებ მშვიდად და კომფორტულად ცხოვრებას. დაგეგმვასთან ერთად წინასწარ დაათვალიერე სარემონტო და სამშენებლო მასალების მაღაზიები, სადაც ხარისხიანი პროდუქტის ყიდვას შეძლებ. ყიდვამდე კი აუცილებლად დარწმუნდი, რომ ფასი და ხარისხი ერთმანეთის პროპორციულია. 

6. დახვდი სიურპრიზებს მომზადებული

როგორც დასაწყისშივე გითხარით, სარემონტო პროცესი შეიძლება სიურპრიზებით იყოს სავსე. მნიშვნელოვანია, რომ გაუთვალისწინებელ დაბრკოლებებს მომზადებული დახვდე და ალტერნატიული სამოქმედო გეგმა გქონდეს მზად. კარგი იქნება, თუ ასეთი შემთხვევებისთვის ბიუჯეტში ცალკე გამოყოფ თანხას და რეზერვში რამდენიმე ხელოსანსაც გაითვალისწინებ. 

ჩვენი რჩევების გათვალისწინებით სარემონტო პროცესი მნიშვნელოვნად გაგიმარტივდება. წინასწარ შედგენილი გეგმა და ზუსტად გაწერილი ბიუჯეტი მოულოდნელობებისგან დაგაზღვევს, ხოლო სანდო პროფესიონალები და ხარისხიანი სარემონტო მასალა კომფორტის შეგრძნებას მოგიტანს.