როგორ ავარჩიოთ საუკეთესო განათება სახლის დიზაინის მიხედვით?

განათება ინტერიერის დიზაინის უმნიშვნელოვანესი ნაწილია. მას შეუძლია, მთლიანად გარდაქმნას სახლის მუხტი, შეცვალოს სივრცის აღქმა და ესთეტიკა. სწორი განათება ქმნის თბილ გარემოს, გამოკვეთს დეკორის იმ ნაწილს, რომელიც განსაკუთრებით მოგწონთ და, რამდენადაც გასაკვირი არ უნდა იყოს, ოთახს იმაზე დიდს აჩენს, ვიდრე ის სინამდვილეშია.

ამ უპირატესობების მიუხედავად, სწორი განათების დამოუკიდებლად შერჩევა საკმაოდ ძნელი დავალებაა. სწორედ ამიტომაც, ეს ბლოგი საკუთარი ინტერიერის უკეთ გაცნობასა და მისი მიხედვით განათების არჩევაში დაგეხმარებათ.

განათების ტიპები

მანამ, სანამ ინტერიერის განხილვაზე გადავიდოდეთ, აუცილებელია, გვესმოდეს, რომ განათების სხვადასხვა ტიპები განსხვავებულ მიზანს ემსახურება. ისინი ცვლის განწყობასა და ოთახის ატმოსფეროს, შეუძლია, ოთახი მყუდრო და თბილი, ცივი ან ნათელი და ენერგიული გახადოს. თუკი დატვირთული დეკორი გაქვთ და გინდათ, რომ გარკვეული არქიტექტორული მახასიათებელი ან, სულაც, ოთახის საყვარელი ნაწილი ყველასთვის შესამჩნევი, ნათელი და გამოკვეთილი გახადოთ, სწორედ განათება უნდა დაიხმაროთ.

განათების რამდენიმე ძირითადი ტიპი არსებობს:

ამბიენტური განათება

ამბიენტური განათება ისეთი განათების ტიპია, რომელიც ყველაზე ხშირად გამოიყენება ინტერიერის დიზაინში. ამბიენტურ განათებას ნებისმიერი გზით, მარტივად და ბევრი ფიქრის გარეშე მიიღებთ, ამისთვის კი ჭაღებისა და სანათების დახმარება დაგჭირდებათ. ამ დროს შუქი თანაბრად ვრცელდება ოთახის ყველა წერტილში. ხშირად გამოიყენება სამზარეულოში, სასტუმრო ოთახში - იმ ადგილებში, რომლებშიც სინათლის თანაბარი განაწილება მნიშვნელოვანია. სადილს ამზადებთ, სტუმრებს იღებთ თუ მშვიდად მოკალათებული უყურებთ ფილმს, კომფორტული და მარტივი განათება მშვიდ განწყობას შეგიქმნით. 

ამბიენტური განათება განათების პირველი შრეა. როდესაც დაგეგმავთ, რომ განათების ეს ტიპი გამოიყენოთ, გაითვალისწინეთ ოთახის ზომა და ფუნქციაც, ასევე ისიც, თუ რა დოზით შემოდის ოთახში ბუნებრივი სინათლე. ოთახს, რომელსაც დიდი ფანჯრები აქვს, არ დასჭირდება ამბიენტური განათების დიდი დოზით გამოყენება. თუკი ოთახში პატარა ფანჯარა გაქვთ, ეს განათება სინათლის მასიური წყარო იქნება.

კონკრეტული განათება

განათების ეს ტიპი, როგორც ამას მისი სახელწოდება გვეუბნება, ანათებს სპეფიციკურ არეალს, რომელსაც კონკრეტული ქმედებების შესასრულებლად იყენებთ, მაგალითად კითხვის, მუშაობისთვისა და საჭმლის მომზადებისათვის. დაათვალიერეთ სანათები, რომლებსაც მაგიდაზე ახლოს დაიდგამთ და ისე შეასრულებთ დავალებას. 

კონკრეტული განათება მეტ აქცენტს აკეთებს იმაზე, თუ რისი გაკეთება არის იმ მომენტში თქვენთვის პრიორიტეტული, იქცევს მეტ ყურადღებას და წარმოაჩენს კონკრეტული ადგილის ფუნქციასაც. თქვენ კი დაგეხმარებათ, რომ უფრო მეტად კონცენტრირებული იყოთ და გაფანტულად მუშაობის ნაცვლად, უფრო ყურადღებით მოეკიდოთ დავალებას.

აქცენტური განათება

აქცენტური განათება აქცენტს აკეთებს პატარ-პატარა დეტალებზე. თუკი გსურთ, გამოკვეთოთ საყვარელი ხელოვნების ნიმუში - ნახატი, არქიტექტურული დეტალი, თაროები თუ მცენარეები, მაშინ განათების ეს ტიპი უნდა აირჩიოთ. ამით ყურადღებას მიაპყრობთ ინტერიერის გამორჩეულ ნაწილზე, გამოხატავთ საკუთარ პრეფერენციას და მიუთითებთ მნახველს, რომ სწორედ დეკორის ეს ნაწილი მიგაჩნიათ ყველაზე ძვირფასად და გამორჩეულად. ამგვარად, აქცენტური განათების საშუალებით, შეძლებთ, მეტი რამ თქვათ საკუთარ თავზე.

განათება და ინტერიერის სახეები

რა ხდება მაშინ, თუკი უკვე შერჩეული გაქვს სახლის ინტერიერი, წინასწარ გაქვს წარმოდგენილი, თუ როგორი იქნება შენი სახლის თითოეული ოთახი და ზოგადი მუხტი, ახლა კი საბოლოო შტრიხების სახით განათება გჭირდება, რომ უფრო გაახალისოს და გამოკვეთოს სივრცე? აუცილებლად უნდა გაერკვე ინტერიერის რა სახეები არსებობს და განათების რომელი ტიპი მიესადაგება მათ:

თანამედროვე ინტერიერი

თუკი თანამედროვე ინტერიერს ანიჭებ უპირატესობას, ესე იგი, მინიმალისტურ დიზაინს, ნეიტრალურ ფერებს თუ სუფთა ხაზებს, მაშინ ამბიენტური განათება საუკეთესო არჩევანია. რამდენადაც მარტივი იქნება ინტერიერი, მით უფრო მეტად განათდება ოთახი და სინათლე ოთახის ყველა წერტილს გამოკვეთს. ასეთი ყოვლისმომცველი განათება შეავსებს მინიმალისტურ ესთეტიკას. 

ტრადიციული ინტერიერი

ტრადიციული ინტერიერი ხასიათდება მდიდარი ფერებით, მოჩუქურთებული ავეჯით, უმეტესწილად ბეჟ ფერებში გადაწყვეტილი მეტლახით და კლასიკური დიზაინით. თუკი თქვენი ოთახი ამ პრინციპით გაქვთ მოწყობილი, კონკრეტული განათების ტიპი გამოგადგებათ. ეს განათება გამოკვეთს ყველაზე მნიშვნელოვან და ძვირფას დეტალებს თქვენს ოთახში. აქცენტს გააკეთებს ფერების ერთმანეთში გადასვლაზე და ხაზს გაუსვამს ვინტაჟურ სტილს.

ხის ინტერიერი

ხის ინტერიერის შესაქმნელად ბუნებრივი მასალისგან - ძირითადად, ქვისა და ხისგან -  დამზადებული ავეჯი დაგჭირდებათ. იმის გამო, რომ ქვით მოპირკეთებული დეკორი უნიკალურ და გამორჩეულ ელფერს სძენს ოთახს, აქცენტური განათება კიდევ უფრო მეტ ყურადღებას გაამახვილებს ინტერიერზე. შეგეძლებათ, ბოლომდე გამოაჩინოთ თქვენთვის განსაკუთრებული დეტალები და მნახველს მიუთითოთ, რას მიაქციოს მეტი ყურადღება ოთახში. რაც შეეხება ხეს და ხის ლამინატით მოწყობილ სახლს, მას ამბიენტური განათება მოუხდება - მეტ სიმყუდროვეს და კომფორტს შექმნის.

თუკი ამ ყველაფერთან ერთად ეზოც გაქვთ, არ გამოგრჩეთ შორს მანათობელი ფანრების შეძენა. შეძლებთ, იგი ეზოს გარშემო გაანაწილოთ და სინათლე მიმართოთ სახლისაკენ. ამგვარად, სახლს მეტ მისტიკურობასა და ორიგინალურობას შესძენთ.

შეჯამება

განათების სწორად არჩევას შეუძლია თქვენი ინტერიერი სრულებით შეცვალოს. განათების ტიპების საბასიზო ცოდნა დაგეხმარებათ, ყურადღება მიაქციოთ კონკრეტულ დეტალებს და გადაწყვეტილება სახლის მუხტისა და დეკორის გათვალისწინებით მიიღოთ. 

თუკი ახლა იწყებთ ინტერიერის დაგეგმვას და რჩევებს წინასწარ კითხულობთ, წაიკითხეთ სექტორის ბლოგი მისაღები ოთახის მოწყობის შესახებ. რაც მთავარია, არ დაივიწყოთ განათების ტიპებზე მიღებული ინფორმაცია სახლის მოწყობის პროცესში.